በአማራ ክልል ያለን የአስተዳደር ስያሜ በሌላ ስም መጥራት ፀብ አጫሪነት ነው አለ፤ አብን

ሰሞኑን በአማራ ክልል ሰሜን ሸዋ ዞን፣ ምንጃር ሸንኮራ ወረዳ አውራ ጎዳና ከተማ ተፈጥሮ በነበረ ግጭት የበርካታ ሰዎች ሕይወት ማለፉ ይታወቃል ይላል አብን ዛሬ ባወጣው መግለጫ፤

ሰሞኑን የአማራ ክልል ሰሜን ሸዋ ዞን ውስጥ በምንጃር- ሸንኮራ ወረዳ፤ አሞራ ቤት ቀበሌ፤ አውራ ጎዳና ከተማ ውስጥ የተፈጠረው የጸጥታ ችግር በዚህ ማዕቀፍ ውስጥ የሚታይ ሆኖ ሳለ ግጭቱን የተለየ ክስተት ለማስመሰል እና ችግሩን ወደ ሕዝብ ለሕዝብ ግጭት ለማውረድ የተሄደበትን ርቀት አብን ያወግዛል ብሏል በመግለጫው።

ገዥው ፓርቲ በውስጡ ያሉ ልዩነቶቹን በጠረጴዛ ዙሪያ መፍታት ሲገባው፣ የዜጎችን ሞት በማስታከክ ሕዝብ ከሕዝብ የሚያጋጭ እና ሀገራችንን ወደከፋ ቀውስ ውስጥ የሚከት የመግለጫ ጋጋታ ማውጣት ኃላፊነት የጎደለው እና እጅግ አደገኛ አካሄድ በመሆኑ በቶሎ እንዲታረም አብን አጥብቆ ይጠይቃል ብሏል::

ሕብረ-ብሄራዊነት የሀገር ጌጥ መሆን የሚችለው በሴራም ሆነ በብልጣብጦች መንገድ ሳይሆን በእውነተኛ አስቻይ አማካይ የፖለቲካ መንገድ ነው፡፡ ወንድማማችነት የሚኖሩት የሕዝብ እውነታ እንጂ በየመድረኩና በየመግለጫው የሚደሰኩሩት ልፋፌ ሊሆን አይገባምያለው አብን

ኢትዮጵያ በመከባበር ስሜት የሁላችንም መሆን ካልቻለች የማናችንም ልትሆን አትችልም ብሏ በመግለጫው፡፡

የኢትዮጵያ ፖለቲካ ከልሂቃን ሽኩቻ ወጥቶ ዜጎች የመብት ባለቤት የሚሆኑበትን አስቻይ የፖለቲካ ሥርዓት መፍጠር ካልተቻለ ከፊት ለፊታችን ያለው ሀገራዊ አደጋ ከእስካሁኑ የከፋ ከባድ ዋጋ እንዳያደስከፍለን ያሰጋል ብሏል፡፡

የአማራና የኦሮሞ ሕዝብ በኢትዮጵያ የሀገር ምስረታም ሆነ የሀገር-ግንባታ ታሪክ ውስጥ የገዘፈ ሚና ያላቸው ከቋንቋ ማንነት በላይ በጋራ የሚጋሯቸው ማህበራዊ ትስስራቸው የጎላ ሁለት ቋንቋ ተናጋሪ አንድ ቤተሰብ ናቸው፡፡ ለዚህም ነው አብን በዚሁ መግለጫው ላይ “በሁለቱ የሸዋ ህዝቦች መካከል” የሚል አግባብ ያለው አገላለጽ የተጠቀመው፡፡ እውነታው ይህ ሆኖ ሳለ ገዥው ፓርቲ በውስጡ ያለበትን የፖለቲካ ልዩነት ተከትሎ ግጭትን ወደሕዝብ ለሕዝብ ለማውረድ የሚያደረገው ኃላፊነት የጎደለው ሙከራ በሕግም ሆነ በታሪክ ያስጠይቀዋል ሲል ገዢው ፖርቲ ብልፅጋናን ከሷል፡፡

በርግጥም የሚያስጨንቀን የዜጎች ሞት ከሆነ የተፈጠረውን ግጭት እና የሕይወት መጥፋት በተገቢው ገለልተኛ አካል ማጣራት እየተቻለ ጉዳዩን የተለየ ምስል ለመስጠት፣ በግልፅ አማራ ክልል ውስጥ ያለን የአስተዳደር ክልል ሌላ ስያሜ በመስጠት እና ባልተገባ ሁኔታ የእኔ ክልል አካል ነው በማለት ጸብ አጫሪ የሆኑ መግለጫዎችን መስጠት በአስቸኳይ እንዲቆም እየጠየቅን ገዥው ፓርቲ እና የሚመራው መንግሥት የሕዝብን ደኅንነት አደጋ ላይ ከሚጥሉ እንቅስቃሴዎች እራሱን እንዲያቅብ ጥሪያችንን እናስተላልፋለን ብሏል አብን ዛሬ ባወጣው መግለጫ ፡፡

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe