በኢትዮጵያ የሚንቀሳቀሱት ሁለቱም የቴሌኮም ኦፕሬተሮች፣ ኢትዮ ቴሌኮም እና ሳፋሪኮም ኢትዮጵያ፣ መንግሥት ባወጣው አዲስ መመሪያ መሠረት የአገሪቱን የአደጋ መከላከል አቅም ለማጠናከር የሚውለውን የ5 በመቶ ክፍያ ተግባራዊ ማድረግ መጀመራቸው ተነግሯል።
መንግሥት በአዋጅ ቁጥር 1386/2017 እና በሚኒስትሮች ምክር ቤት ደንብ ቁጥር 576/2018 መሠረት፣ የአገሪቱን የአደጋ መከላከልና የመቋቋም አቅም በራስ አቅም ለመገንባት ከ17 የገቢ ምንጮች ቋሚ ሀብት ለመሰብሰብ መወሰኑ ይታወሳል።
ከእነዚህ የገቢ ምንጮች መካከል በቴሌኮም የድምፅና የዳታ አየር ሰዓት ሽያጭ ላይ የሚጣለው የ5 በመቶ ክፍያ አንዱ ሲሆን፤ ይህም ከየካቲት ወር 2018 ዓ.ም. ጀምሮ በሁለቱም ኦፕሬተሮች አማካኝነት ተግባራዊ መደረግ ጀምሯል።
ይህ የአደጋ ሥጋት ምላሽ ፈንድ አሰባሰብ በቴሌኮም ዘርፍ ላይ ብቻ የተገደበ ሳይሆን፤ ባንኮችን፣ ኢንሹራንስን፣ የነዳጅ ሽያጭን፣ የአየር መንገድና ሌሎች የትራንስፖርት ዘርፎችን፣ እንዲሁም የንግድ ፈቃድ አገልግሎትን ጨምሮ በጥቅሉ 17 የገቢ ምንጮችን የሚያካትት አገራዊ መርሃ ግብር ነው።
የፈንዱ ዋና ዓላማ በተፈጥሮና ድንገተኛ አደጋዎች ወቅት በውጭ ዕርዳታ ላይ ያለንን ጥገኝነት በመቀነስ፣ አገር በቀል የአደጋ መከላከያ አቅምን በራስ አቅም ለመገንባት መሆኑን መንግሥት ቀደም ብሎ ማስታወቁ ይታወሳል።
በዚህም መሠረት ሁለቱም የቴሌኮም ኩባንያዎች ከደንበኞቻቸው የአየር ሰዓትና የዳታ ግዢ ላይ የ5 በመቶ ክፍያን በመሰብሰብ ለአገራዊ የአደጋ ሥጋት ምላሽ ፈንድ ጽሕፈት ቤት ገቢ ማድረግ ጀምረዋል።

