ወደ ቀያቸው የተመለሱ አርሶ አደሮች ቀለብ እተሰፈረልን አንኖርም የእርሻ መሳሪያዎችና በሬዎች ይሟሉልን አሉ

በአማራ ክልል ማዕከላዊ ጎንደር ዞን ቤት የተቃጠለባቸውን ሰዎች ወደ ነበሩበት ለመመለስ የሚደረገው ጥረት ቀጥሏል። ወደቦታቸው በመመለስ ላይ ያሉ አርሶ አደሮች ቀለብ እተሰፈረልን አንኖርም የእርሻ መሳሪያዎችና በሬዎች ይሟሉልን ብለዋል።

ሰሞኑን የጋዜጠኞች ቡድን በማዕከላዊ ጎንደር ዞን ያለውን ተፈናቃዮችን መልሶ የማቋቋም የስራ ሁኔታ በመጎብኘት ላይ ነው። ትናንት በዚሁ ዞን ጭልጋ ቁጥር 2 ላዛ በተባለው ቦታ እንደተመለከትነው የተቃጠሉ ቤቶችን መልሶ የመገንባቱ ሥራ መቀጠሉን ለማየት ችለናል።

የላዛ ቀበሌ ነዋሪ አቶ ስመኘው ጥሩነህ የሰባት ቤተሰብ አስተዳዳሪ ናቸው። በአማራና ቅማንት ማህበረሰቦች መካከል ተከስቶ በነበረው ግጭት የደረሰባቸውን ሁኔታ ለዶይቼ ቬለ DW እንደተገሩት ቤት ንብረታቸውና ሀብታቸው ወድሟል።

አርሶ አደሩ አያይዘውም የተደረገላቸውን ድጋፍና ስጋታቸውን እንዳብራሩት ወቅቱ የዘር ወቅት በመሆኑ አስፈላጊው የግብርና መሳሪና በሬዎች ሊዘጋጁላቸው ይገባል ካልሆነ ግን ቀጣዩን ዓመት ለመኖር አስቸጋሪ ነው ብለዋል፡፡ የጭልጋአርሶ አደር ቀለብ በጣሳ ተሰፍሮለት ህይወቱን አይመራም ነው ያሉት። መንግስት ወደ ቦታቸው እንዲመልሳቸው ማድረጉንና መኖሪያ ቤታቸው እንዲሰራ ማድረጉ መልካም ነገር እንደሆነም አመልክተዋል።

ሌላዋ የዚህ ቀበሌ ነዋሪ ወ/ሮ አያል ክብረት ናቸው። አራት ህጻናትን ያለ አባት ያሳድጋሉ፣ በግጭቱ ወቅት የነበራቸውን ሁሉ አጥተዋል። መንግስት ቤት እንዲገነቡ ሁኔታውን እንዳመቻቸላቸው አስረድተዋል።

አቶ ሚካኤል ንብረት የጭልጋ ቁጥር 2 ላዛ ቀበሌ ቤት ግንባታ አስተባባሪ ናቸው። በአካባቢው 210 ቤቶች መቃጠላቸውን ጠቁመው አሁን ከግማሽበላይ ቤቶች ተገንብተዋል፡፡ በቀጣይ 10 ቀናት ውስጥ ሁሉም ቤቶች ተገንብተው ይጠናቀቃሉ እንደ አቶ ሚካኤል።

ተመላሾቹ የሚያነሷቸውን የእርሻ ቁሳቁስ በተመለከተ ምላሽ የሰጡት የአማራ ክልል አደጋ መከላከል ምግብ ዋስትና ፕሮግራምና ልዩ ድጋፍ የሚሹ አካባቢዎች ማስተባበሪያ ኮሚሽን ኮሚሽነር አቶ አማረ ክንዴ እንዳሉት የግብርና ግብዓቶችን ለማቅረብ ጥናቶች እተካሄዱ ነው ብለዋል፡፡

ከሌሎች ክልሎች የተፈናቀሉ ወገኖችን ወደነበሩበት ለመመለስ ከአጎራባች ክልሎች ጋር በጋራ እየተሰራ መሆኑን ደግሞ የቤት ግንባታውን በቦታው ተገኝተው ሲጎበኙ ያገኘናቸው የአማራ ክልል ምክርቤት የህግ ፍትህ እና አስተዳደር ጉዳዮች ቋሚ ኮሚቴ ሰብሳቢ አቶ አማረ ሰጤ ተናግረዋል፡፡

በምዕራብና ማዕከላዊ ጎንደር ዞኖች በአጠቃላይ 1097 ቤቶች የተገነቡ ሲሆን 36 ሺህ ተፈናቃዮች ወደ ቦታቸው መመለሳቸውን የአደጋ መከላከል ምግብ ዋስትና ፕሮግራምና ልዩ ድጋፍ የሚሹ አካባቢዎች ኮሚሽን አመልክቷል፡፡

ምንጭ፡ ዶይቼ ቬለ

Kumneger Media
Kumneger Media
Kumneger Media is a News and Entertainment Website & Channel. Kumneger Media in addition to News and Entertainment it is the hub of Politics, Movies, Drama, Music, Comedy, Documentary and More!

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe