የቆቃ ኃይል ማመንጫ ጣቢያ የሚያመነጨው የኤሌክትሪክ ኃይል፣ በደለል መንስዔ መቀነሱን ተሰማ፤

ቆቃ ያመነጭ ከነበረው 42 ሜጋ ዋት እያመነጨ ያለው ከ10 ሜጋ ዋት በታች ነው ተብሏል፤

በሕዝብ ተወካዮች ምክር ቤት የውኃ፣ መስኖ፣ ቆላማ አካባቢ እና አካባቢ ልማት ጉዳዮች ቋሚ ኮሚቴ፤ የቆቃ ኃይል ማመንጫ ጣቢያ የሚያመነጨው የኤሌክትሪክ ኃይል፣ በደለል መንስዔ መቀነሱን አረጋገጠ፡፡

ቋሚ ኮሚቴው ይህን ያረጋገጠው፤ ሰሞኑን በቆቃ ኃይል ማመንጫ ጣቢያ የመስክ ጉብኝት ባደረገበት ወቅት ነው፡፡

ከሐይቁ ደለል የማስወገድ ሥራ፤ ላለፉት 20 ዓመታት ያህል የተቋረጠ በመሆኑ፣ ሐይቁ ለከፍተኛ የደለል ክምችት ተጋልጧል፡፡ በዚህም መንስዔ፤ የሚያመነጨው የኤሌክትሪክ ኃይል በእጅጉ እንደቀነሰ ታውቋል፡፡

የሐይቁ ጥልቀትም ከ10 ሜትር ወደ አንድ ሜትር አካባቢ መቀነሱን፤ ከዘርፉ ባለሙያዎች ገለጻ መረዳት ተችሏል፡፡

በሐይቁ የውኃ ይዘት መቀነስ ምክኒያት፤ ከሦስቱ ተርባይኖች አንዱ ሥራ እንዳቆመ ያረጋገጠው ቋሚ ኮሚቴው፤ ባለፉት ዘመናት 42 ሜጋ ዋት ያመነጭ የነበረው ይህ የኃይል ማመንጫ ጣቢያ፤ አሁን ባለው ነባራዊ ሁኔታ ከ10 ሜጋ ዋት ያልበለጠ ኃይል እንደሚያመነጭም ተገንዝቧል፡፡

የቋሚ ኮሚቴው ቡድን አስተባባሪ የተከበሩ አቶ መስፍን ዳኜ፤ ኃይል ማመንጫ ጣቢያው የሚጠበቀውን ያህል ኃይል እያመነጨ ባለመሆኑ፣ የውኃ እና ኢነርጂ ሚኒስቴርን ጨምሮ የክልሉ መንግስት እና በተለያዩ ርከኖች የሚገኙት አመራሮች የተቀናጀ እና የጋራ አቋም ሊኖራቸው እንደሚገባ አመላክተዋል፡፡

የቆቃ ኃይል ማመንጫ ጣቢያ የኦፕሬሽን ኃላፊ አቶ ወልደማርያም ጥላዬ በበኩላቸው፤ ከሞጆ ቆዳ ፋብሪካዎች የሚወጣው ኬሚካል ፍሳሽ ሐይቁን እንደበከለ፤ የበፈር ዞን ሕግ ባለመኖሩ ሐይቁ ከሰው እና እንሰሳ ንክኪ ነጻ አለመሆኑ እና በደለል መሞላቱ፤ ተጠቃሽ ችግሮች መሆናቸውን አስረድተዋል፡፡

ሐይቁ በእንቦጭ አረም እንዳይወረር በየዓመቱ ሕዝብን ያሳተፈ የጽዳት ዘመቻ የሚካሄድ እንደሆነ የገለጹት አቶ ወልደማርያም፤ የደለል ክምችቱን ለመቀነስ በአካባቢው ችግኝ ከመትከል ባለፈ የተከናወነ ሥራ አለመኖሩንም ገልጸዋል፡፡

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe