የአሜሪካዋ ግዛት በልጆች የቲክቶክ እና ኢኒስታግራም አጠቃቀም ላይ ገደብ ጣለች

የአሜሪካዋ ዩታህ ግዛት አዳጊዎች ፌስቡክን፣ ቲክቶክ እና ኢነስታግራምን የመሰሉ ማኅበራዊ ሚዲያ አጠቃቀማቸው ላይ ገደብ በመጣል የመጀመሪያዋ ግዛት ሆነች።

የዩታህ ገዢ እንዳሉት የማኅበራዊ ሚዲያ አገልግሎት አቅራቢ ኩባንያዎች ለልጆች አገልግሎቱን ከማቅረባቸው በፊት የወላጆችን ይሁንታ ማግኘት ይኖርባቸዋል።መተግበሪያዎቻቸውም ከ18 ዓመት በታች ለሆኑ አዳጊዎች ያለ ወላጅ ይሁንታ እንዳይከፍቱ ያደረጋሉ።

በዚህ ረቂቅ መሠረት ኩባንያዎቹ የአዳጊዎቹን የማኅበራዊ ሚዲያ አጠቃቀም፣ ታሪክ፣ የለጠፏቸውን እና በግል የተጻጻፏቸውን መልዕክቶች ሁሉ ለወላጆች መስጠት ይገደዳሉ።

ይህን እርምጃ መውሰድ ያስፈለገው ማኅበራዊ የትስስር መድረኮች በልጆች የአእምሮ ጤና ላይ ከፍ ያለ መረበሽን እያደረሱ መሆኑ ከተደረሰበት በኋላ ነው።

ሐሙስ መጋቢት 14/2015 ዓ.ም. በጸደቀው በዚህ ደንብ መሠረት ወላጅ ወይም አሳዳጊ ልጆቹ ኢኒስታግራም፣ ፌስቡክ እና ቲክቶክ ከመክፈቱ በፊት የወላጅ ይሁንታ ማግኘት ይኖርበታል።

ከዚህ ሌላ አዳጊዎች እነዚህን ማኅበራዊ ትስስር መድረኮች ከምሽቱ 4፡00 ሰዓት እስከ ንጋት 12፡30 ድረስ መጠቀም እንዳይችሉ ይደነግጋል።

ከዚህ ሌላ የማኅበራዊ ሚዲያ አቅራቢ ኩባንያዎች የልጆቹን ፍላጎት እና ምርጫ መሠረት አድርገው ማስታወቂያ በልጆቹ የማኅበራዊ ሚዲያ ሰሌዳቸው ላይ እንዳይለቁ ይገደዳሉ።

ረቂቅ ሕጉ ተግባራዊ መሆን የሚጀምረው ከሚቀጥለው ዓመት መጋቢት ጀምሮ ነው።

የግዛቷ ገዢ ስፔንሰር ኮክስ በትዊተር ሰሌዳቸው “ማኅበራዊ ሚዲያዎች የልጆቻችንን አእምሮ እንዲበርዙ መፍቀድ የለብንም” ሲሉ ጽፈዋል።

በልጆች መብት ላይ የሚሠሩ ተቋማት እርምጃው ይበል የሚያሰኝ እና ለሌሎች ግዛቶች አርአያ የሚሆን ነው ሲሉ አወድሰውታል።

ተመሳሳይ ሕጎች በቴክሳስ፣ በኦሃዮ፣ በአርካንሳስ፣ በኒው ጀርሲ እና በሊዊዚያና ግዛቶች እየተረቀቁ ነው ተብሏል።

ፌስቡክ እና ኢንስታግራምን የሚያስተዳድረው ሜታ ኩባንያ በበኩሉ ልጆችን ከጉዳት የሚታደግ፣ ወላጆችም የልጆቻቸውን የማኅበራዊ ሚዲያ አጠቃቀም እንዲከታተሉ የሚያስችል ዘዴዎችን ቀይሰን እየሠራን ነው ሲል ለቢቢሲ በቃል አቀባዩ በኩል ተናግሯል።

የሁለቱ ምክር ቤቶች ጉባኤ ላይ ፕሬዝዳንት ጆ ባይደን ባለፈው ወር እንደተናገሩት፣ ሪፐብሊካኖች እና ዲሞክራቶች በጋራ ልጆችን ከማኅበራዊ ሚዲያ ተጽእኖ የሚያላቅቅ እና ኩባንያዎቹም በልጆች እንዳይነግዱ የሚያደርግ ረቂቅ እንዲዘጋጅ ጠይቀው ነበር።

ዩታህ ግዛት ይህን ረቂቅ ይፋ ያደረገችው የአሜሪካ ምክር ቤት የቲክቶክ አለቃ የሆኑትን ዢ ዚ ቺውን በጥያቄ እና መልስ ከመረመራቸው በኋላ ነው።

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe