የአዲስ አበባ ከተማ አስተዳደር ከ28 ዓመታት በላይ ያስቆጠሩ በርካታ መኖሪያ ቤቶችን ያለ ምንም የጽሑፍ ማስጠንቀቂያ አፈረሰ

የአዲስ አበባ ከተማ አስተዳደር በቦሌ ክፍለ ከተማ ጨፌ ዓድዋ ፓርክ ተብሎ በሚታወቀው ሥፍራ፣ ከ28 ዓመታት በላይ ያስቆጠሩ ሁለት ዕድር ቤቶችን ጨምሮ በርካታ መኖሪያ ቤቶችን ያለ ምንም የጽሑፍ ማስጠንቀቂያ እንዳፈረሱባቸው ነዋሪዎች  ገለጹ፡፡

አካባቢው ለካንሰር ሕክምና ማዕከል ግንባታና ለልማት ይፈለጋል ትነሳላችሁ የሚል የቃል ማስጠንቀቂያ የተሰጠ ቢሆንም፣ ለተነሺዎቹ ምንም ዓይነት ምትክ ቦታ ሳይሰጥ አንዳንዶቹም የፍርድ ቤት ዕግድ ደብዳቤ ይዘው ሳለ፣ በአቋራጭ የከተማ አስተዳደሩ ቤቶቹን ማፍረሱ ዱብ ዕዳ እንደሆነባቸው፣ አንድ ስማቸው እንዳይጠቀስ የፈለጉ የዕድር አባል ለሪፖርተር ተናግረዋል፡፡

ከ368 በላይ አባዎራዎችን የያዙ የተባበሩት መድኃኔዓለምና ቦሌ ደብረ ጽጌ የተባሉ ዕድር ቤቶችን ጭምር ያፈረሰው የከተማው አስተዳደር፣ ምትክ ቦታ ይሰጣችኋል ማለቱን፣ አንዳንድ ነዋሪዎች ደግሞ ከ30 ዓመታት በላይ በቦታው ላይ እንደቆዩ አክለው ገልጸዋል፡፡

‹‹ካርታ ይሰጣችኋል ጠብቁ ተብለን ሳለ የከተማ አስተዳደሩ ለ30 ዓመታት ያህል የኖርንበት ቤት ያለ ቅድመ ማስጠንቀቂያ በሁለት ቀናት ውስጥ ለቃችሁ ውጡ ብሎ በማፍረሱ፣ ወዴትም ሄደን እንድንጮህ ዕድል አልሰጠንም፤›› ሲሉ በአካባቢው ይኖሩ የነበሩ አንድ በዕድሜ ገፋ ያሉ ነዋሪ ለሪፖርተር ተናግረዋል፡፡

የአዲስ አበባ ከተማ አስተዳደር ከንቲባ ወ/ሮ አዳነች አቤቤ ለሚዲያ በጉዳዩ ዙሪያ ማብራሪያ ሲሰጡ፣ ቦታው በዋነኝነት የጤና ተቋማት እንዲገነቡበት ታስቦ የተደረገ ነው ሲሉ ተደምጠዋል፡፡

የሚገነባው የጤና ተቋም ‹‹ለኢትዮጵያ ልዩ ተቋም ነው፣ የሕይወት ጉዳይ ነው፤›› በማለት ተናግረው ነበር፡፡

‹‹በተጨማሪም ለግንባታው ያማከለ ቦታ ወሳኝ ከመሆኑ ባሻገር፣ ኢትዮጵያን በአዲስ አበባ ደረጃ የምትገለጽ ዋና ከተማ ማድረግ አለብን፤›› ብለዋል፡፡

ሪፖርተር በዓድዋ ፓርክ አካባቢ ተገኝቶ እንዳረጋገጠው ቤቶቹ ሙሉ በሙሉ የፈረሱ ሲሆን፣ ከከተማ አስተዳደሩ ተጨማሪ መረጃ ለማግኘት የተደረገው ጥረት ሳይሳካ ቀርቷል፡፡

Kumneger Media
Kumneger Media
Kumneger Media is a News and Entertainment Website & Channel. Kumneger Media in addition to News and Entertainment it is the hub of Politics, Movies, Drama, Music, Comedy, Documentary and More!

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe