የዝንጀሮ ፈንጣጣ (ኤምፖክስ) የበሽታው ምልክቶች ምንድን ናቸው?

የዓለም ጤና ድርጅት በዚህ ሳምንት በዴሞክራቲክ ሪፐብሊክ ኮንጎ እና በጎረቤት ሀገራት የተከሰተውን የዝንጀሮ ፈንጣጣ (ኤምፖክስ) ዓለም አቀፍ አሳሳቢ ድንገተኛ የኅብረተሰብ ጤና አደጋ ሆኗል ሲል አውጇል፡፡

ይህ እየተስፋፋ የሚገኘው ወረርሽኝ በፈረንጆቹ 2022 ከተከሰተው የዝንጀሮ ፈንጣጣ (ኤምፖክስ) ወረርሽኝ መንስኤ ከሆነው ቫይረስ የበለጠ ተላላፊና ለሞት የሚዳርግ ቫይረስ መሆኑ ተነግሯል፡፡

ወረርሽኙ በአፍሪካ ከተከሰተ ጀምሮ 15,000 ሰዎች በቫይረሱ የተያዙ ሲሆን 461 ሰዎች ሕይወት አልፏል፡፡

ምንም እንኳን ቫይረሱ እንደ ኡጋንዳ ፣ ኬንያና ሩዋንዳ ባሉ ሌሎች አገራት እየተዛመተ ቢሆንም አብዛኞቹ የበሽታው ተጠቂዎች በዴሞክራቲክ ሪፐብሊክ ኮንጎ የሚገኙ ናቸው።

በተጨማሪም ስዊድን በትናንትናው ዕለት በቫይረሱ የተያዘ ሰው መገኘቱን በማረጋገጥ በአውሮፓ የመጀመሪያዋ ሀገር ሆናለች፡፡

በዴሞክራቲክ ሪፐብሊክ ኮንጎ በወረርሽኙ ማዕበል በዋነኛነት የተጠቁት ህፃናት ናቸው።

በሀገሪቱ በቫይረሱ ከተያዙ ሰዎች ውስጥ 70 በመቶ የሚሆኑት ከ15 ዓመት በታች የሆኑ ህፃናት ሲሆኑ 62 በመቶ የሞት መጠንም በእነዚው ህጻናት ላይ የተከሰተ ነው።

ይሁን እንጂ የተባበሩት መንግሥታት ድርጅት የቫይረሱን ባሕርይ እና አጠቃላይ ሁኔታ በተሻለ መንገድ ለመረዳት በቫይረሱ ላይ ክትትል ማጠናከር አስፈላጊ መሆኑን ገልጿል።

በቅርቡ በዴሞክራቲክ ሪፐብሊክ ኮንጎ የተከሰተውና በጣም አሳሳቢ የተባለው የቫይረስ ዓይነት “ክሌድ 1ቢ” የሚባል ሲሆን ይህ የቫይረስ ዓይነት በተለይም ህጻናትን የበለጠ ለሞት የሚዳርግ መሆኑ ይነገራል፡፡በተጨማሪም በከፍተኛ ሁኔታ ከሰው ወደ ሰው የሚተላለፍ መሆኑም ተገልጿል፡፡

ከዚህ ቀደም በ2022 ለተከሰተው ዓለም አቀፍ ወረርሽኝ መንስኤ የሆነው “ክሌድ 2” በመባል የሚታወቀው የቫይረስ ዓይነት በምዕራብ አፍሪካና በሌሎች አገሮች ዝቅተኛ የስርጭት መጠን ያለው ቢሆንም አሁንም መሰራጨቱን ቀጥሏል።

የበሽታው ምልክቶች ምንድን ናቸው?

ምልክቶቹ እንደ ኩፍኝ፣ የባክቴሪያ የቆዳ ኢንፌክሽን እና ከአደንዛዥ ዕፅ ጋር የተያያዙ አለርጂዎች ካሉ ሌሎች በሽታዎች ጋር ሊመሳሰል እንደሚችል የዓለም ጤና ድርጅት አስጠንቅቋል፡፡

በበሽታው የተያዙ ሰዎች በአብዛኛው ከአንድ እስከ ሦስት ቀናት እንደ ትኩሳት ፣ ከባድ ራስ ምታት ፣ የወገብ ሕመም ፣ የጡንቻ ሕመም እና አቅም ማጣት የመሳሰሉ ምልክቶች ይታይባቸዋል።

ከእነዚህ ምልክቶች በኋላ ከሁለት እስከ አራት ሳምንታት ደግሞ የሰውነት ሽፍታና መቁሰል የመሳሰሉ ምልክቶችን ያስከትላል፡፡

ይህ አዲስ ዓይነት ቫይረስ በከፍተኛ ሁኔታ ተላላፊ ሲሆን ከሰው ወደ ሰው የሚተላለፈውም በበሽታው ከተያዘ ሰው ጋር በቅርበት በመገናኘት ማለትም ፊት ለፊት በቅርበት በመነጋገር ወይም በትንፋሽ እና በቆዳ ንክኪ መሆኑ ተመላክቷል፡፡

ምንጭ፤ የዓለም ጤና ድርጅት

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe