ጦርነቱ ከቀጠለ ቅድሚያ ለሚሰጣቸው ፕሮጀክቶች ብቻ ትኩረት እንደሚደረግ መንግሥት አስታወቀ!

በሕዝብ ተወካዮች ምክር ቤት በአሸባሪነት ከተሰየመው ከሕወሓት ታጣቂዎች ጋር እየተካሄደ ያለው ጦርነት በዚሁ ከቀጠለ፣ በመልማት ላይ ካሉና ወደ ሥራ ይገባሉ ተብለው ከተያዙ አገራዊ ፕሮጀክቶች ውስጥ ቅድሚያ ትኩረት የሚያስፈልጋቸው ላይ እንደሚያተኩር የፌዴራል መንግሥት አስታወቀ፡፡

ጥቅምት 24 ቀን 2013 ዓ.ም. የሕወሓት ኃይል በአገር መከላከያ ሠራዊት ሰሜን ዕዝ ላይ ጥቃት በመፈጸሙ ምክንያት፣ የፌደራል መንግሥት ሲያካሂደው የነበረውን የሕግ ማስከበር ዘመቻ በመግታት የተናጠል ተኩስ አቁም ማድረጉ ይታወሳል፡፡ ከዚህ በኋላ የሕወሓት ታጣቂዎች በአማራና በአፋር ክልሎች ላይ ወረራ ከፈጸሙ ሦስት ወራት ገደማ ሆኗል፡፡

በጦርነቱም በትግራይ፣ በአማራና በአፋር ክልሎች በደረሰው ሰብዓዊና ቁሳዊ ቀውስ የፌደራል መንግሥት በርካታ ቢሊዮን ብሮች በሚቆጠር ሀብት ዕርዳታ እያቀረበ መሆኑን፣ የገንዘብ ሚኒስትር ዴኤታ እዮብ ተካልኝ (ዶ/ር) ሰሞኑን ለጋዜጠኞች በሰጡት መግለጫ ተናግረዋል፡፡

የፌደራል መንግሥት የተናጠል ተኩስ በማቆም ከትግራይ ክልል ከመውጣቱ አስቀድሞ ጠቅላይ ሚኒስትር ዓብይ አህመድ (ዶ/ር) ለፓርላማው ባቀረቡት ሪፖርት ለትግራይ ክልል የሰብዓዊ ድጋፍ አቅርቦት ከ100 ቢሊየን ብር በላይ ወጪ መደረጉን አስታውቀው ነበር፡፡

ይሁን አንጂ በቀጠለው ጦርነት እየደረሰ ባለው ቀውስ ምክንያት፣ የተቋረጡ ወይም የተስተጓጎሉ አገራዊ ፕሮጀክቶች ስለመኖራቸው ሪፖርተር ሚኒስትር ዴኤታውን ማብራርያ ጠይቆ በሰጡት ምላሽ፣ በጦርነቱ ምክንያት እስካሁን የፕሮጀክቶች ገንዘብ መጠን እየተቀነሰ ሲለቀቅ የነበረ ቢሆንም፣ የተቋረጡ ፕሮጅክቶች የሉም ብለዋል፡፡

‹‹ነገር ግን የሰብዓዊ ቀውሱ ወጪ አሁን ባለው ሁኔታ እየጨመረ ከመጣ፣ የሰዎችን ሕይወት ማዳን ቅድሚያ ስለሚሰጠው ትንሽ ከመንገድ፣ ትንሽ ከመስኖ ልማት ፕሮጀክቶች ብንቀንስ ትክክለኛ አካሄድ ይሆናል፤›› ብለዋል፡፡በመሆኑም ወጪ እየጨመረ ከመጣና በተፈለገው መጠን ከአጋሮች የሚገኘው ሀብት ከቀነሰ፣ መንግሥት ቅድሚያ የሚሰጣቸው ፕሮክቶች ላይ የማተኮር አማራጭ ውስጥ ለመግባት እንደሚገደድ ተናግረዋል፡፡

የጦርነት ጉዳት አላስፈላጊ በመሆኑ ጦርነቱ ካሸነፍን በኋላ፣ በዚህች አገር ሁለተኛ ጦርነት እንዳይፈጠር አድርገን መሥራት ያስፈልጋል፤›› ብለዋል፡፡ኢትዮጵያ በአሁኑ ጊዜ በርካታ አገራዊ ፕሮጀክቶችን ለአብነትም የመንገድ፣ የአሌክትሪክ ኃይል፣ የመስኖ፣ የባቡር መስመሮች፣ ዝርጋታና የመሳሰሉት እያካሄደች ትገኛለች፡፡ በመገንባት ላይ ያሉ፣ ይገነባሉ ተብለው በዕቅድ የተያዙና የሀብት ድልድል ለወጣላቸው የመንገድ ፕሮጅክቶች ዋጋ ብቻ ከግማሽ ትሪሊዮን በላይ ብር እንደሚያስፈልጋት መረጃዎች ያሳያሉ፡፡

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe