በ2016 በጀት ዓመት የሠራተኞችን የትምህርት ማስረጃ ትክክለኛነት የማጣራት ሥራ በአዲስ መልክ እንደሚጀምር የአዲስ አበባ ከተማ አስተዳደር ፐብሊክ ሰርቪስና የሰው ሀብት ልማት ቢሮ አስታወቀ።
በአዲስ አበባ ፐብሊክ ሰርቪስና የሰው ሀብት ልማት ቢሮ የሰው ሀብት ክትትል፣ ድጋፍና ኦዲት ዳይሬክተር አቶ መላኩ ተመስገን ለኢትዮጵያ ፕሬስ ድርጅት እንደተናገሩት፤ ቢሮው የከተማውን አጠቃላይ የሰው ሀብት አስተዳደር ሥርዓት በአደረጃጀት፣ በአሠራር እና በሥራ ስምሪት በበላይነት ይመራል። ከዚህ መነሻነት የአዲስ አበባ ከተማ አስተዳደር
ፐብሊክ ሰርቪስና የሰው ሀብት ልማት ቢሮ በ2016 በጀት ዓመት የሠራተኞች የትምህርት ማስረጃን ትክክለኛነት የማረጋገጥ ሥራ በአዲስ መልክ ይጀምራል፡፡
የኢፌዴሪ ትምህርት፣ ሥልጠና ቁጥጥር ባለሥልጣን ማዕከላዊ የሆነ የትምህርት ማስረጃ የማጣሪያ ሥርዓት ማዘጋጀቱ ፍተሻውን ቀላል ያደርገዋል ያሉት አቶ መላኩ፤ ቢሮው በ2016 በጀት ዓመት የሠራተኞችን የትምህርት ማስረጃ ትክክለኛነት የማጣራት ሥራ በአዲስ መልክ እንደሚጀምር ገልጸዋል።
ከ2010 እስከ 2013 ዓ.ም መጀመሪያዎቹ ድረስ ሕገወጥ የትምህርት ማስረጃ ፍተሻ ሲያከናውን መቆየቱን ገልጸው፤ በወቅቱ የትምህርት ማስረጃዎችን ለማጣራት በርካታ ተግዳሮቶች በማጋጠሙ የማጣራት ሥራው ተቋርጦ ቆይቷል። አሁን ባለሥልጣኑ የተመረቁ ተማሪዎችን መረጃ የማጣራት አቅም ያለው በመሆኑ አሠራሩን ያቀለዋል ብለዋል።
ቢሮው ከዚህ በፊት ሲሠራቸው የነበሩ የመረጃ ማጣራት ሥራዎችን በተሞክሮ መልክ በመውሰድ በ2016 በጀት ዓመት በመጀመሪያ ዲግሪ እና ከዚያ በላይ የተመረቁ ሠራተኞችን የትምህርት ማስረጃ የማጣራት ሥራ ይጀምራል። ለዚህም የተለያዩ ዝግጅት ሥራዎች እየተሠራ መሆኑን ገልጸዋል።
እንደ ዳይሬክተሩ ገለፃ፤ ሕገ ወጥ የትምህርት ማስረጃ መያዝ ተጠያቂነቱ ከባድ ከመሆኑ ባለፈ ወንጀል ነው። ከ2010 እስከ 2013 ዓ.ም ድረስ በነበረ የትምህርት ማስረጃ ፍተሻ ከ626 ተቋማት 450 የሚደርሱ ሕገወጥ የትምህርት ማስረጃዎች በአመራሩ እና በሠራተኛው ላይ ተገኝቷል።
የፍተሻ ሥራው የሚከናወነው የመንግሥት ሥራዎች ተቀላጥፈው እንዲሠሩ እና ኅብረተሰቡ የሚፈልገውን አገልግሎት በፍጥነት እንዲያገኙ እንዲሁም የመልካም አስተዳደር ችግሮችን ለመፍታት ነው ያሉት ዳይሬክተሩ፤ ፍተሻው በኮሚቴ ተዋቅሮ ከፖሊስ ኮሚሽን ጋር በጥምረት የሚሠራ ነው ብለዋል።

