በአዲስ አበባ ከተማ የሚኖሩ ነዋሪዎች ከትራንስፖርት እጥረት ባለፈ ከተቀመጠው ታሪፍ በላይ እያስከፈሏቸው መሆኑን ቅሬታቸውን በተደጋጋሚ ለአሐዱ አሰምተዋል፡፡
አሐዱም የነዋሪዎችን ቅሬታ አዳምጦ ለሚመለከተው አካል ጥያቄ ሰንዝሯል፡፡
በአዲስ አበባ ትራንስፖርት ባለስልጣን የትራንስፖርት ስምሪትና ቁጥጥር ዳይሬክተር አቶ ዬሴፍ ተስፋዬ ችግሮች መኖራቸውን አምነው ይህንንም ለመፍታት ከሚመለከታቸው ባለድርሻ አካላት ጋር በጥምረት እየሰራን ነው ብለዋል፡፡
የትራንስፖርት ታሪፍ ከተሻሻለበት ጊዜ ጀምሮ ትርፍ ለማግኘት ወይም ያለ አግባብ ጥቅም ለማግኘት ከመስመር ውጭ የትራንስፖርት አገልግሉት ሲሰጡ የነበሩ፤ ከታሪፍ በላይ የጫኑና ሌሎችን ጨምሮ 357 አሽከርካሪዎች ላይ እርምጃ መወሰዱን ዳይሬክተሩ ገልፀዋል፡፡
አክለውም በቀጣይ የቁጥጥር ስራው ተጠናክሮ እንደሚቀጥል ዳይሬክተሩ ጠቁመው ያለአግባብ ትርፍ ለማግኘት ከታሪፍ በላይ የሚያስከፍሉና ከመስመር ውጭ የሚሰሩትን ኅብረተሰቡ ታርጋቸውን በመያዝ ጥቆማ በመስጠት እንዲተባበራቸው አሳስበዋል፡፡

