ኢትዮጵያን በውጭ የሚወክሏት አምባሳደሮች በአዲስ መልኩ ሊዋቀሩ ነው

ኢትዮጵያን በውጭ የሚወክሏት ሚሲዮኖች ጥናትን መሰረት በማድረግ በአዲስ መልኩ እንደሚዋቀሩ ምክትል ጠቅላይ ሚኒስትርና የውጭ ጉዳይ ሚኒስትር ደመቀ መኮንን ገለጹ።

ምክትል ጠቅላይ ሚኒስትርና የውጭ ጉዳይ ሚኒስትር ደመቀ መኮንን በትናንትናው ዕለት፤ ለ10 ቀናት የሚቆይ የዲፕሎማቶችና የተጠሪ ተቋማት ሠራተኞች ሥልጠና ባስጀመሩበት ወቅት ባስተላለፉት መልዕክት፤ ለውጡን ተከትሎ የውጭ ጉዳይ ሚኒስቴር ተልዕኮውን በብቃት ለመፈጸም የሚያስችለውን የአሰራር ማሻሻያ እያደረገ መቆየቱን ተናግረዋል።

በተለይም ላለፉት ስድስት ወራት ሲከናወኑ የነበሩ የአሰራር ማሻሻያ ጥናቶችና ተግባራቶች አሁን ላይ ከሞላ ጎደል ተጠናቅቀው ለትግበራ መዘጋጀታቸውንም አስታውቀዋል።ሥልጠናውም ማሻሻያ በተደረጉባቸው የተቋሙ አሰራሮች ላይ የጋራ ግንዛቤ ለመያዝ ያስችላል ብለዋል።

የአሰራር ማሻሻያዎቹ ተቋሙ የተጣለበትን ሃላፊነትና ተልዕኮዎች በብቃት ለመወጣት ታሳቢ ተደርጎና ጥናት ላይ መሰረት በማድረግ የተከናወኑ መሆናቸውን አስረድተዋል።

በተለይ ዋና መሥሪያ ቤቱ አጠቃላይ የዲፕማሲ ሥራው የሚያሳልጥ ዋነኛ ማዕከል እንዲሆን ታልሞ የተካሄደ የአሰራር ማሻሻያ መሆኑን ገልጸዋል።ሚሲዮኖችና ቆንጽላዎች የሚያከናውኑትን ተግባራት፣ የሚያጋጥማቸውን ፈተናና ያሏቸው እድሎችን ከግምት ያስገባ ግምገማ እንደተደረገባቸውም ተናግረዋል።

ጥናትን መሰረት በማድረግና የአጋር አካላትን ምክረ ሃሳብ ከግምት በማስገባት ሚሲዮኖቹን በአዲስ መልኩ የማዋቀር ሥራ እንደሚሰራም አረጋግጠዋል።ይህንንም ተከትሎ ዲፕሎማቶችን በእነዚሁ ሚሲዮኖች የመመደብ ሥራ እንደሚካሄድ ጠቁመው፤ ሠልጣኞቹ በኢትዮጵያ ላይ በውጭ ሃይሎች እየደረሰ ያለውን ጫና ከግምት ያስገባ ጠንካራ የዲፕሎማሲ ሥራ ማከናወን እንዳለባቸው አሳስበዋል።

ሥልጠናው አህጉራዊና ዓለም አቀፋዊ ለውጦች ከግምት ያስገባ የዲፕሎማሲ ሥራ ለመሥራት የሚያስችሉ ክህሎቶችን ለማጎልበት ትኩረት እንደሚያደርግም ተገልጿል።መደበኛ የዲፕሎማሲያዊ አሰራር ከዲጂታል ዲፕሎማሲ ጋር በማጣመር የሚሲዮኖች ተልዕኮን በብቃት መወጣት የሚያስችሉ ጉዳዮችም ሌላኛው የሥልጠናው ትኩረት መሆኑን ኢዜአ ዘግቧል።

 

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe