ይልቅ ወሬ ልንገርህ – ስለ አድዋ ፖን አፍሪካ ዩኒቨርሲቲ  ግንባታ የጠቅላይ ሚኒስትሩ ዝምታ

መቼም ሀገሪቷ ዩኒቨርሲቲ በዩኒቨርሲቲ ከሆነች ቆይታለች አይድል? እናስ? እናማ የዛሬ ሁለት ዓመት ገደማ የቀድሞ ጠቅላይ ሚኒስትር አቶ ኃይለማርያም ደሳለኝ  የዓድዋን ድል ለመዘከር ለሚገነባው የዓድዋ ፓን አፍሪካ ዩኒቨርሲቲ ግንባታ የሚውል የመሠረት ድንጋይ ጥለው ነበር፤ እናስ? እናማ ስራውን ለማስጀመር ለጠቅላይ ሚኒስትሩ ጥያቄ  ቢቀርብም ምላሹ ዝምታ ብቻ ሆነብኝ ሲል ኮሚቴው እያለቃቀሰ ነው፡፡

እንዴት አልክ? መቼም ጠቅላይ ሚኒስትሩ  ‹ከዚህ በኋላ አንድም ግንባታ አናስጀምርም፤ ያሉትን ማስጨረስ እንጂ› ማላታቸውን ታስታውሳለህ አይደል? እናስ፤ እናማ  ገንዘብ ለማሰባሰብ የሚያስችል ዝግ የባንክ አካውንት እንዲከፈት ለጠቅላይ ሚኒስትር ጽሕፈት ቤት ጥያቄ አቅርቦ ምላሽ በመጠበቅ ላይ መሆኑን የዓድዋ ፓን አፍሪካ ዩኒቨርሲቲ የምስረታ አስተባባሪ ኮሚቴ ያስታወቀ ሲሆን አሁንም የተሰጠ ምላሽ የለም።

የኮሚቴው አስተባባሪ አቶ ቢተው በላይ ለአዲስ ዘመን ጋዜጣ እንደተናገሩት፣ለዩኒቨርሲቲው ምስረታ በርካታ ዓለም አቀፍ ድርጅቶች ድጋፍ ለመስጠት ፍላጎት አሳይተዋል። ኮሚቴው ድጋፉን ለመቀበል የሚያስችል የገንዘብ ማስገቢያ የባንክ አካውንት እንዲከፈትለት ለጠቅላይ ሚኒስትር ጽሕፈት ቤት ጥያቄ አቅርቦ ምላሽ በመጠበቅ ላይ ይገኛል፡፡

ከመጋቢት 2010 ዓ.ም ጀምሮ እስካሁን ድረስ ለሦስት ጊዜያት ያህል ጥያቄውን ለጽሕፈት ቤቱ ቢያቀርብም እስካሁን ድረስ ምላሽ አላገኘም፡፡ ከዓለም አቀፍ ድርጅቶች የሚገኘውን ድጋፍ ለመቀበል እንዲሁም ሕዝቡ ከድጋፉ ስለሚገኘው ገንዘብ ማወቅና ገንዘቡም ሕጋዊ አሰራርን ተከትሎ ኦዲት መደረግ ስላለበት በጠቅላይ ሚኒስትሩ የሚከፈት ዝግ የባንክ አካውንት እንደሚያስፈልግ ገልፀዋል፡፡

‹‹ባለፈው ዓመት የፌዴራል መንግሥት ለዩኒቨርሲቲው ግንባታ የገባውን የ200 ሚሊዮን ብር ድጋፍ በቅርቡ ይሰጣል የሚል ተስፋ አለን›› ያሉት ሰብሳቢው፣ የትግራይ ክልል መንግሥት 250 ሚሊዮን ብር ለመስጠት ቃል መግባቱንና የአዲስ አበባ ከተማ አስተዳደር 10 ሚሊዮን ብር መስጠቱን ተናግረዋል፡፡ ሌሎች ክልሎችም ድጋፍ እንደሚያደርጉ ቃል ስለመግባታቸው ጠቁመዋል፡፡

ከዚህ በተጨማሪም፣ ‹‹በውጭ አገራት የሚገኙ ኢትዮጵያውያንና የሌሎች አገራት ምሁራንን አነጋግረናል፤ የተለያዩ ኮርሶችን ለማስተማርና የገንዘብ ድጋፍ ለማድረግም ዝግጁ እንደሆኑ ገልጸውልናል›› ብለዋል፡፡ በ2010 ዓ.ም በአዲስ አበባና በዓድዋ አገር አቀፍና ዓለም አቀፍ ኮንፈረንሶች መካሄዳቸውን አስታውሰው፣ በወቅቱ ከበርካታ አካላት ጋር ግንኙነት መፈጠሩን አስረድተዋል፡፡ አስተባባሪ ኮሚቴው ካሉት ዐቢይ ኮሚቴዎች መካከል በአሁኑ ወቅት በንቃት እየተንቀሳቀሱ ያሉት የስርዓተ-ትምህርት ቀረፃና የሕዝብ ግንኙነት ኮሚቴዎች እንደሆኑም አቶ ቢተው ተናግረዋል፡፡

ለግንባታው 10 ቢሊዮን ብር ያስፈልገዋል የተባለው የዓድዋ ፓን አፍሪካ ዩኒቨርሲቲ የመሰረት ድንጋይ በሚያዚያ ወር 2009 ዓ.ም በቀድሞው የኢ.ፌ.ዴ.ሪ ጠቅላይ ሚኒስትር አቶ ኃይለማርያም ደሳለኝና በኡጋንዳው ፕሬዚዳንት ዩዌሪ ካጉታ ሙሴቬኒ አማካኝነት መቀመጡ ይታወሳል፡፡

እናስ? እናማ ስለ አድዋ ለማስጠናት የግድ አዲስ ዩኒቨርሲቲ መገንባት አለበት ያለው ማነው አልክ? ለምን በአሁን በስራ ላይ ካሉት 44 ዩኒቨርሲቲዎች መሀከል አንዱን ለፖን አፍሪካ ዩኒቨርሲቲ ሰጥቶ ወይም ስለ አድዋ የሚያስተምር ትምህርት ክፍል ከፍቶ የተበጀተውን በጀት ለሌላ የልማት ስራ አይውልም አልክ? ምናልባት ይሄ ይሆናል የጠቅላይ ሚኒስትሩ ምላሽ፤ አንድ ወዳጄ ይህንን ዜና ሲሰማ ምን አለ መሰለህ? ‹ደግሞ 45ኛ ዩኒቨርሲቲ እንገንባ?ግፍ ነው› በል ቻዎ

Kumneger Media
Kumneger Media
Kumneger Media is a News and Entertainment Website & Channel. Kumneger Media in addition to News and Entertainment it is the hub of Politics, Movies, Drama, Music, Comedy, Documentary and More!

LEAVE A REPLY

Please enter your comment!
Please enter your name here

ትስስር ይፍጠሩ

325,851FansLike
49,039FollowersFollow
13,194SubscribersSubscribe